गोंदिया, दि. 29 ऑक्टोंबर : गोंदिया वनविभागातील उत्तर देवरी वनपरिक्षेत्रांतर्गत सहवनक्षेत्र सावली नियतक्षेत्र डोंगरगांव, मधील क्रमांक 555 (संरक्षीत बन) येथे दिनांक 28/10 रोजी सकाळी 09.05 वाजताचे दरम्यान वन्यप्राणी बिबट सिमेंट बंधा-याच्या चिखलातील गाडेमध्ये फसुन मृत अवस्थेत पडुन असल्याचे गस्ती दरम्यान वनकर्मचा-यांना आढळून आले. सदर घटनेची माहिती प्राप्त होताच उत्तर दवेरी वनपरिक्षेत्राचे वनपरिक्षेत्र अधिकारी, क्षेत्र सहाय्यक, वनरक्षक हे पशुवैद्यकिय अधिकारी, देवरी, यांचेसह मौक्यावर उपस्थित होवून मौका स्थळी मृत वन्यप्राणी बिबटची पाहणी केली असता, मृत बिबटचे सर्व अवयव साबुत असल्याचे दिसून आले तसेच सदर बिबटचा सिमेंट बंधा-याच्या चिखलातील गाळेमध्ये फसुन मृत्यू झाल्याचे प्राथमिकरित्या दिसून आले.
तसेच बिबट मृत्यूची दुसरी घटना तिरोडा वन परिक्षेत्रांतर्गत बडेगांव सहवनक्षेत्रात घडलेली असून तिरोडा वनपरिक्षेत्रातील भजेपार नियतक्षेत्रात मौजा भजेपार येथील कक्ष क्रमांक 65 संरक्षीत वन क्षेत्रात अंदाजे दुपारी 12.00 वाजताचे दरम्यान वन्यप्राणी बिबट मृतावस्थेत आढळून आलेला आहे. उक्त घटनेबाबत माहिती प्राप्त होताच तिरोडा वनपरिक्षेत्राचे वनपरिक्षेत्र अधिकारी, क्षेत्र सहाय्यक, वनरक्षक, पशुवैद्यकिय अधिकारी, श्री आर. जी. शेंडे, तिरोडा यांचेसह मौक्यावर उपस्थित होवून मौका स्थळी मृत वन्यप्राणी बिबटची पाहणी केली असता, मृत बिबटचे सर्व अवयव साबुत असल्याचे दिसून आले. तसेच सदर विवटचा मृत्यू झाडावरुन पडून पोटाच्या भागात गंभीररित्या जखमी होवून झाल्याचे प्राथमिकरित्या दिसून आले.
सदर दोन्ही घटनास्थळी श्री. प्रमोदकुमार पंचभाई, उपवनसंरक्षक गोंदिया, श्री सचिन डोंगरवार, सहा, वनसंरक्षक (रोहयो व वन्यजीव) गोंदिया, वनपरिक्षेत्र आधिकारी उत्तर देवरी, वनपरिक्षेत्र अधिकारी, तिरोडा, श्री. सावन बहेकार, मानद वन्यजीव रक्षक, गोंदिया, श्री. रुपेश निबातें, संचालक हिरवळ बहुददेशिय संस्था गोंदिया यांनी भेट देवून पशुवैद्यकिय अधिकारी, यांचे उपस्थितीत मृत बिबटच्या शवाची तपासणी करण्यात आली. व पशुवैद्यकिय अधिकारी यांचेकडून सदर दोन्ही मृत बिबटचे शव विच्छेदन करण्यात आले व मृत बिबटच्या अवयवाचे नमुने उत्तरीय तपासणी करीता सिलबंद करण्यात आले तसेच सर्व वन अधिकारी व कर्मचारी यांचे उपस्थित मृत बिबटचे शव जाळून नष्ट करण्यात आले. सदर दोन्ही बिबट वन्यप्राण्याचे मृत्यू प्रकरणी उपवनसंरक्षक गोंदिया वनविभाग गोंदिया यांचे मार्गदर्शनाखाली सहाय्यक वनसंरक्षक (रोहयो व वन्यजीव) गोंदिया हे पुढील तपास करीत आहेत.
