गोंदिया , दि. 12 ऑक्टबर : पोलीस ठाणे केशोरी येथे अवैध दारू विक्री, भांडण तंटा, विनयभंग संबंधाने अनेक गुन्हे दाखल आहेत. पोलिसांनी त्याचे विरुद्ध वारंवार प्रतिबंधात्मक कारवाई करून सुध्दा त्याचेत सुधारणा झालेली नाही.
सदर गुन्हेगाराच्या कृतीमुळे परीसरातील सार्वजनिक शांतता व सुव्यवस्था धोक्यात आली असल्याने त्याचे विरूद्ध सहाय्यक पोलीस निरीक्षक, सोमनाथ कदम पोलीस ठाणे केशोरी यांनी गुन्हेगार नामे : 1) गणेश मुखरू कांबळे रा. प्रतापगड, 2) महेश मिश्रीलाल राठी रा. गोठनगाव, 3) धनंजय संतोष राठी रा. गोठनगाव, 4) जितेंद्र तुळशीराम गजभिये रा. गोठनगाव, 5) सिंधू जितेंद्र गजभिये रा. गोठनगाव, या पहीची आरोपींना गोंदिया जिल्हा हद्दीतून हद्दपार ( तडीपार ) करणे करीता कलम 56 (अ),(ब) महाराष्ट्र पोलीस अधिनियम अन्वये प्रस्ताव उपविभागीय अधिकारी तथा उपविभागीय दंडाधिकारी, अर्जुनी मोर यांचे कडे मंजुरीस्तव सादर केला होता.
उपविभागीय अधिकारी तथा उपविभागीय दंडाधिकारी, अर्जुनी मोर यांचे आदेशानुसार संकेत देवळेकर उपविभागीय पोलीस अधिकारी, देवरी यांनी विहीत मुदतीत सदर हद्दपार प्रस्तावाची प्राथमिक चौकशी पूर्ण करून सदर गुन्हेगारास गोंदिया जिल्हा हद्दीतून हद्दपार करण्याची शिफारस केली होती. या अनुषंगाने उपविभागीय अधिकारी तथा उपविभागीय दंडाधिकारी, अर्जुनी मोर वरूनकुमार जनार्दन सहारे यांनी सर्व 5 जणांना 1 महिन्यापर्यंतच्या कालावधी करीता गोंदिया जिल्ह्यातुन हद्दपार करण्यात येत असल्याबाबतचे आदेश दिले आहेत.
गोंदिया जिल्हा पोलीस व उपविभागीय अधिकारी तथा उपविभागीय दंडाधिकारी, अर्जुनी मोर यांनी केलेल्या हद्दपार कारवाईमुळे अवैध कृत्य करणाऱ्या गुन्हेगारांचे धाबे दणाणले असून केशोरी पोलीस स्टेशन हद्दीतील नागरिकांनी केलेल्या कारवाईवर समाधान व्यक्त केले आहे. सदरची कारवाई निखिल पिंगळे, पोलीस अधिक्षक, अशोक बनकर अपर पोलिस अधीक्षक यांच्या मार्गदर्शनाखाली करण्यात आली आहे.
